हिमायतनगर : शहरात सध्या डेंग्यू, मलेरिया, टायफॉइडसारख्या आजारांच्या साथी आहेत. या पार्श्वभूमीवर, नगरपंचायतीच्या वतीने वृत्तपत्र, सोशल मीडियाद्वारे शहरात जनजागृती करण्यात येत आहे. नगरपंचायतीमार्फत संपूर्ण शहरात लवकरच धूर फवारणी करण्यात येणार आहे. ओला व सुका कचरा संकलनासाठी शहरातील प्रमुख ठिकाणी नुकत्याच कचराकुंड्या बसविण्यात आल्या.
२३ नोव्हेंबर २०१९ रोजी मुख्याधिकारी प्रियांका टोंगे, नगराध्यक्ष कुणाल राठोड व उपनगराध्यक्ष मो. जावेद गन्नी यांच्या उपस्थितीत कचराकुंड्या बसविण्यात आल्या. ‘शहरातील सर्व नागरिकांनी या कचराकुंड्यांचा वापर करून शहर स्वच्छतेच्या दृष्टीने नगर पंचायतीला सहकार्य करावे,’ असे आवाहन नगराध्यक्ष कुणाल राठोड व मुख्याधिकारी प्रियांका टोंगे यांनी केले आहे.
या वेळी उपविभागीय अधिकारी महेश वडदकर, तहसीलदार एन. बी. जाधव, गटविकास अधिकारी सुहास कोरेगावे नगरपंचायत कार्यालय परिसरात उपस्थित होते. शहरात जागोजागी कचराकुंड्या बसविण्याच्या कामास या वेळी सुरुवात करण्यात आली. नगराध्यक्ष कुणाल राठोड, उपाध्यक्ष मो. जावेद, मुख्याधिकारी प्रियांका टोंगे, नगरसेवक रामभाऊ ठाकरे, नगरसेवक प्रतिनिधी अन्वरखान पठाण, सदाशिवराव सातव, नगरसेवक प्रभाकर अण्णा मुधोळकर, सावन डाके, गुफरान भाई, विनायक मेंडके, अभियंता रमाकांत बाच्छे, शेख मेहबूब, बालाजी हरडपकर, विठ्ठल शिंदे, शामसुंदर पाटील, संदीप उमरे, विठ्ठल बनसोडे यांच्यासह स्वच्छता कर्मचारी या वेळी उपस्थित होते.
‘ओला कचरा व सुका कचरा वेगवेगळा गोळा करण्यासाठी ६० मोठ्या कुंड्या व ४० लहान कुंड्या नगर पंचायतीने आणल्या आहेत. त्या कुंड्या प्रत्येक वॉर्डात लावण्यात येणार आहेत. कचरा उचलणे ही नगर पंचायतीची जबाबदारी आहे, तसेच प्रत्येक नागरिकाने आपापल्या घरातील ओला व सुका कचरा वेगळा करूनच कचराकुंड्यांत टाकावा,’ असे आवाहन नगराध्यक्ष कुणाल राठोड यांनी केले.
